Month: May 2022

જીઆઇ અંતર્ગત ૪૧૭ પ્રોડકટ રજિસ્ટર્ડ કરવામાં આવ્યા છે એમાંથી ર૩૧ યુનિક ટેકસટાઇલના પ્રોડકટ છે, ટેકસટાઇલ કમિટીએ ૬૯ પ્રોડકટને રજિસ્ટર્ડ કરવા માટે મહત્વનું યોગદાન આપ્યું છે અને અન્ય ૪૯ જેટલા ક્રાફટને આઇડેન્ટીફાય કર્યા છે, આગામી દોઢ વર્ષમાં ક્રાફટના પ્રોડયુસર અને વિવર્સને પણ પ્રોટેકશન આપી શકાશે : ટેકસટાઇલ્સ કમિટીના સેક્રેટરી અજિત બી. ચવાણ

સુરત. ભારત સરકારના કાપડ મંત્રાલયની ટેકસટાઇલ કમિટી, હેન્ડીક્રાફટ ડેવલપમેન્ટ કોર્પોરેશન, ધી સધર્ન ગુજરાત ચેમ્બર ઓફ કોમર્સ એન્ડ ઇન્ડસ્ટ્રી અને ધી સુરત જરી મેન્યુફેકચરર્સ એસોસીએશનના સંયુકત ઉપક્રમે સોમવાર, તા. ૩૦ મે, ર૦રર ના રોજ સવારે ૧૦:૩૦ કલાકે સમૃદ્ધિ, નાનપુરા, સુરત ખાતે ‘આઇપીઆર પ્રોટેકશન ઓફ યુનિક ટેકસટાઇલ્સ એન્ડ હેન્ડીક્રાફટેડ પ્રોડકટ્‌સ થ્રુ જીઆઇ એન્ડ પોસ્ટ જીઆઇ ઇનીશીએટીવ્સ’ વિષય ઉપર વર્કશોપનું આયોજન કરવામાં આવ્યું હતું. જેમાં ભારતના ટેકસટાઇલ્સ અને રેલ્વે રાજ્ય મંત્રી દર્શનાબેન જરદોશ મુખ્ય મહેમાન તરીકે ઉપસ્થિત રહયા હતા. જયારે ટેકસટાઇલ્સ કમિટીના સેક્રેટરી અજિત બી. ચવાણે અતિથિ વિશેષ તરીકે સ્થાન શોભાવ્યું હતું. આ વર્કશોપમાં ધારાસભ્ય અરવિંદ રાણા પણ ઉપસ્થિત રહયા હતા.

ચેમ્બરના પ્રમુખ આશીષ ગુજરાતીએ સ્વાગત પ્રવચન કરતા જણાવ્યું હતું કે, જરીનો ઉપયોગ ઘણા વર્ષો પહેલાથી થાય છે પણ જરીને જીઆઇ સર્ટિફિકેટ મળે એટલે પ્રોડકટની વેલ્યુ વધી જશે. ચેમ્બર દ્વારા વૈશ્વિક કક્ષાએ આ બાબતે માર્કેટીંગ કરવામાં આવશે. ફ્રાન્સ પછી આપણો બીજો નંબર આવે છે ત્યારે એના માટે કેપીટલાઇઝેશન કરવું જોઇએ.

ભારતના ટેકસટાઇલ્સ અને રેલ્વે રાજ્ય મંત્રી દર્શનાબેન જરદોશે જણાવ્યું હતું કે, સુરતમાં અલગ અલગ પ્રકારની જરીની પ્રોડકટ બને છે. જરી બનાવવા માટે ઘણી મહેનત લાગે છે અને એની પ્રોડકટ પણ ખૂબ જ મોંઘી હોય છે. તમિળનાડુ અને વારાણસી વિગેરે અન્ય રાજયોમાં જવાનું થાય છે ત્યારે ત્યાં ખબર પડે છે કે અહીં સુરતની જરી આવે છે. આથી જરી ઉદ્યોગને ડેવલપ કરવો પડશે. જેમ કાશ્મીરમાં નવી પેઢીને કાશ્મીરી શાલ બનાવવાનું શીખવાડવામાં આવ્યું છે તેમ સુરતમાં પણ જરી ઉદ્યોગકારોએ તેમની યુવા પેઢીને જીઆઇ ટેગનો ઉપયોગ કરીને માર્કેટીંગ કરવાનું છે અને જરીની પ્રોડકટ બનાવવાનું શીખવવું પડશે. આ યુવા પેઢીએ જરી ઇન્ડસ્ટ્રીને સપોર્ટ કરવાનો છે અને પ્રોડકટમાં વેલ્યુ એડીશન કરવાની છે.

તેમણે ઉદ્યોગકારોને રિયલ જરીની ડિમાન્ડ કરનારું માર્કેટ શોધવા તેમજ જરીની પ્રોડકટ કવોલિટી અને કવોન્ટીટી સાથે ઝડપી બનાવવા હેતુ નવી મશીનરી ડેવલપ કરવા જણાવ્યું હતું. નોર્થ ઇસ્ટમાં નીફટની એક ટોપર યુવતિનો ઉલ્લેખ કરતા તેમણે જણાવ્યું હતું કે, આ યુવતિએ તેની માતાની પ૦ વર્ષ જૂની સાડી ફાડીને એ મટિરિયલ્સમાંથી હેન્ડલુમ / હેન્ડીક્રાફટની આઠ જેટલી વસ્તુઓ બનાવી હતી. આથી તેમણે જરી ઉદ્યોગકારોને વિવિધ કાર્યક્રમોમાં જરીની સાડીઓ તથા અન્ય પ્રોડકટનું પ્રમોશન કરવા અનુરોધ કર્યો હતો. સાથે જ સુરતની જરીનો ઉપયોગ દેશ–વિદેશમાં કોઇપણ પ્રોડકટમાં કરાયેલો હશે તો તેની ઉપર લોગો લગાવી શકાય તે દિશામાં આગળ વધવા માટે ચર્ચા વિચારણા કરવામાં આવી હતી.

ટેકસટાઇલ કમિટીના સેક્રેટરી અજિત બી. ચવાણે જરીના ઉદ્યોગકારોને જરી ઉદ્યોગ માટે ઉપયોગી એવી વિસ્તૃત માહિતી આપી હતી. તેમણે જણાવ્યું હતું કે, સુરત જરીના નામે દેશમાં અથવા વિદેશમાં કોઇ ઇમીટેશન નહીં કરી શકે તે જીઆઇ સર્ટિફિકેશન આપવા પાછળનો મુખ્ય હેતુ છે. જીઆઇ અંતર્ગત ૪૧૭ પ્રોડકટ રજિસ્ટર્ડ કરવામાં આવ્યા છે. એમાંથી ર૩૧ યુનિક ટેકસટાઇલના પ્રોડકટ છે. ટેકસટાઇલ કમિટીએ ૬૯ પ્રોડકટને રજિસ્ટર્ડ કરવા માટે મહત્વનું યોગદાન આપ્યું છે અને અન્ય ૪૯ જેટલા ક્રાફટને આઇડેન્ટીફાય કર્યા છે તથા આગામી દોઢ વર્ષમાં તેમના પ્રોડયુસર અને વિવર્સને પણ પ્રોટેકશન આપી શકાશે.

ટેકસટાઇલ કમિટીના ડાયરેકટર (એમઆર) ડો. તપન કુમાર રાઉતે જરી ઉદ્યોગમાં કવોલિટી પ્રોડકશન માટે જીઆઇ સર્ટિફિકેશન વિશે ઉદ્યોગકારોને સમજણ આપી હતી.

સ્પેશિયલ ગેસ્ટ તરીકે સીએમએઆઇના ભૂતપૂર્વ પ્રમુખ રાહુલ મહેતાએ જણાવ્યું હતું કે, જરી ઉદ્યોગકારોએ બદલાવ લાવવો પડશે. ઘણા લોકો પ્રોડકટ ઉપર રિસર્ચ કરે છે પણ માર્કેટ અંગે પણ રિસર્ચ કરવું પડશે. માર્કેટ સ્ટડી કરીને કસ્ટમર અને પ્રોડકટ વિશે રિસર્ચ કરી આગળ વધવું પડશે.

વર્કશોપ દરમ્યાન ‘હાઉ ટુ લેવરેજ સુરત જરી ફોર બેનીફિટ ઓફ ઓલ વેલ્યુ ચેઇન એકટર્સ’ વિષય ઉપર પેનલ ડિસ્કશન યોજાઇ હતી. જેમાં નવી દિલ્હીથી ગવર્નમેન્ટ ઓફ એમપીના ઓએસડી મહેશ ગુલાટી ઓનલાઇન જોડાયા હતા. પેનલ ડિસ્કશનમાં ગાંધીનગર નિફટના ડાયરેકટર ડો. એ.કે. ખરે, મુંબઇના ડિઝાઇનર બેલા સંઘવી, અમદાવાદના ટેકસટાઇલ ડિઝાઇન એનઆઇડીના એસોસીએટ સિનિયર ફેકલ્ટી ડો. કેતનકુમાર વડોદરીયા અને મુંબઇના રિલાયન્સ પ્રા.લિ.ના વાઇસ પ્રેસિડેન્ટ એન્ડ હેડ (ફેશન) જસપ્રીત ચાંડકે પોતપોતાના મતો રજૂ કર્યા હતા. ધી કલોથીંગ મેન્યુફેકચરર્સ એસોસીએશન ઓફ ઇન્ડિયા (સીએમએઆઇ)ના ભૂતપૂર્વ પ્રમુખ રાહુલ મહેતાએ પેનલ ડિસ્કશનનું સંચાલન કર્યું હતું.

ડિઝાઇનર બેલા સંઘવીએ જણાવ્યું હતું કે, જરીની સાડીઓ તથા અન્ય પ્રોડકટ બનાવવાની જૂની પદ્ધતિ આજની નવી પદ્ધતિ કરતા ઘણી સારી હતી. આથી યુવા પેઢીએ એના ઉપર ફોકસ કરવો જોઇએ. આ ઉપરાંત જરીની પ્રોડકટ માટે યુરોપ તથા અમેરિકાના ડેવલપ માર્કેટમાં રિસર્ચ કરવાની જરૂર છે. સાથે જ વિશ્વમાં પ્લાસ્ટીક જરીની પ્રોડકટની માંગ વધી ત્યારે આ અંગે રિસર્ચ કરવાની તેમજ આ પ્રોડકટને ઓરિજીનલ જરીમાં કઇ રીતે કન્વર્ટ કરી શકાય તે દિશામાં રિસર્ચ કરવાની જરૂર છે.

ચેમ્બરના ગૃપ ચેરમેન બિજલ જરીવાલાએ વર્કશોપનું સંચાલન કર્યુ હતું. અંતે સુરત જરી મેન્યુફેકચરર્સ એસોસીએશનના પ્રમુખ નવીન જરીવાલાએ સર્વેનો આભાર માની વર્કશોપનું સમાપન કર્યું હતું.