08.10.2024, મંગળવાર, વેસુ, સુરત (ગુજરાત):
યુગપ્રધાન,શાંતિદૂત આચાર્યશ્રી મહાશ્રમણજીએ મંગળવારે મહાવીર સમવસરણમાં ઉપસ્થિત જનમેદનીને નવરાત્રિ આધ્યાત્મિક અનુષ્ઠાન કરાવ્યું હતું. ત્યારબાદ ઉપસ્થિત લોકોને આયારો આગમ આધારિત પ્રવચન શૃંખલામાં જણાવ્યું કે માણસે પોતાના જીવનમાં જ્ઞાન અને આચાર બંનેને મહત્વ આપવું જોઈએ. Thanks કેવળ જ્ઞાન હોવું એ પણ ઉણપની વાત છે અને જ્ઞાન વિના આચરણ ક્યારેય સારું હોઈ ન શકે. જ્ઞાન અને આચારનો સમન્વય હોય તો પૂર્ણતાની વાત થઈ શકે. તીર્થંકરોની વાણીમાંથી અહિંસા, સત્ય, અચૌર્ય, બ્રહ્મચર્ય અપરિગ્રહ વગેરેનું જ્ઞાન મળે છે અને તે પ્રમાણે મનુષ્ય વર્તન કરે તો પૂર્ણતાને પ્રાપ્ત કરી શકે છે. જો કોઈની પાસે જ્ઞાન જ ન હોય તો જ્ઞાનનો અભાવ એ અંધત્વ છે અને આચાર ન હોય તો આચારનો અભાવ એ વિકલાંગતા છે.
વ્યક્તિના જીવનમાં જ્ઞાન અને આચારનો સમન્વય કરવામાં આવે તો માનવજીવન પૂર્ણ બની શકે છે. માત્ર જ્ઞાન અને માત્ર ક્રિયા કે આચરણથી કલ્યાણ થતું નથી, જ્ઞાન અને ક્રિયાના સમન્વયથી મોક્ષની પ્રાપ્તિ પણ શક્ય બની શકે છે. પહેલા જ્ઞાન મેળવવાનો પ્રયત્ન કરવો જોઈએ અને પછી જ્ઞાન પ્રમાણે આચરણ કરવું જોઈએ.
ઉદાહરણ તરીકે, જ્યાં સુધી કોઈ માણસ અહિંસા જાણતો નથી, ત્યાં સુધી તે અહિંસાને કેવી રીતે અનુસરી શકે? જે પ્રકારની સાધના કરવાની હોય છે, તે સાધના વિશે પહેલા જાણવું જોઈએ, તો જ વ્યક્તિ કોઈપણ સાધના કરી શકે છે. જો કોઈને ખબર ન હોય કે કયા માર્ગ પર ચાલવાનું છે, તો વ્યક્તિ ભટકી શકે છે. જ્યાં જવું હોય તે માર્ગની પણ જાણકારી હોવી જરૂરી છે. તેથી એટલું તો સ્પષ્ટ છે કે જ્ઞાન મેળવીને જો કોઈ કાર્ય કરવામાં આવે તો તે કાર્ય ફળદાયી બની શકે છે. સુરતમાં આચાર્યશ્રીની મંગલ સન્નિધિમાં સામૂહિક આયંબિલ તપ અનુષ્ઠાનના ભાગરૂપે સેંકડો લોકોએ આચાર્યશ્રીના શ્રી મુખેથી આયંબિલ નું પ્રત્યાખ્યાન કર્યું હતું.